Ich mään jo blooß Neie Baddeichefs – un jetzt?
„Un, Dannde Liesel, was saachscht du zum Schnieder Gordon?“, frooch ich.
„Hä? Zu wem soll ich ebbes saache?“
„Zum neie Vorsitzende vun de CDU im Land. Wann’s recht isch, bittschää.“
„Kenn ich nit“, saacht die Dannde Liesel.
„Des isch de Noochfolscher vum Baldauf“, saach ich. „De Schnieder werd ach Spitzekandidat sei bei de neggschde Wahl.“
„Spitzekandidat fer was?“
„E Gewitter, Dannde Liesel! Fers Amt vum Minischderbrässident naddierlich!“
„Awwer des macht doch die SPD. Warum muss do jetzt noch änner vun de CDU ...?“
„Jetzt awwer! Es muss immer erscht emol gewählt werre, Dannde Liesel. In dem Fall im Friehjohr 2026. Un es kann dann jo sei, dass ach emol die CDU gewinnt.“
„In Rheinland-Palz?“
„Ja, naddierlich!“, saach ich. „Ich mään ... im Brinzibb schunn. De Kohl Helmut war vun de CDU. Un de Vochel Bernhard war vun de CDU. Blooß so als Beischbiele.“
„Du lebscht jo werklich ganz schää in de Vergangeheit, Knechtel. Awwer jetzt hämmer doch erscht emol den Lange.“
„De Schweitzer Alexander hämmer.“
„Un der Schwätzer isch de Rote ihrn Spitzekandidat, gell?“
„Schweitzer, Dannde Liesel. Un ja. Do druff laaft’s naus, deed ich saache.“
„Un der isch ach Landesvorsitzender vun de SPD? So wie der Schni.., der Schnitz ...“
„So wie de Schnieder Gordon?“
„Ja“, saacht die Dannde Liesel.
„Nä“, saach ich. „Bei de SPD macht des jetzt die Bätzing-Lichtenthäler.“
„Jo, geh fort!“
„Wann ich’s dir saach! Die Fraa war im Bundesdaach un hot de Fraktionsvorsitz gemacht un war G’sundheitsminischderin. Un jetzt werd se Landeschefin.“
„Des kapier ich nit. Warum macht des nit der Lange, so wie des der Schnie-dingsbums bei de CDU macht?“
„Guti Frooch, Dannde Liesel. Ich deed saache, die SPD im Land braucht extra jemand, wu ihre de Nacke massiert, weil der vum viele brav Nicke immer so verspannt isch.“
„Ach so!“, saacht die Dannde Liesel un klatscht. „Un weil bei de CDU immer Huddel isch, kinnen die sich de Masseur spare!“
„Reschbeggt, Dannde Liesel. Du hoscht die Bolledigg in Rheinland-Palz jetzt vollumfänglich begriffe.“
Ich mään jo blooß.
Die Kolumne
Michael Konrad schreibt seit 2007 die Kolumne „Ich mään jo blooß“ für jede Ausgabe der RHEINPFALZ am SONNTAG – und natürlich immer auf Pfälzisch. Das Buch zur Kolumne („Ich mään jo blooß: De Ding“, Lipplerbookz, Annweiler, 2022) gibt es zusammen mit allen anderen Büchern des Autors („Saach blooß“, „Können Sie Pfälzisch?“) im Buchhandel und im RHEINPFALZ-Shop.
