Pfälzer Weinkönigin Die Dannde Liesel un die Weikeenichin: Zum Wohl die Palz!
„Saachemol ebbes zu de Pälzer Weikeenichin“, saach ich zu de Dannde Liesel. Fer was hot mer dann e Erbdannde mit emme Iwwerschuss an Määnung.
„En schääne Bobbes“, saacht die Dannde Liesel. „Bei de Frisur wääß ich nicht so recht.“
„Ähm ... geht’s noch?“, saach ich. „Was isch dann des fer en Bleedsinn?“
„Deletzscht hot’s enni gewwe mit emme schääne G’sichtel“, saacht die Dannde Liesel. „Die war mir awwer viel zu groß.“
„Jetzt halt emol de Gaul aa!“, saach ich.
„Hauptsach, kä dicki.“
„Aus, Dannde Liesel! Ich muss worgse!“
„Gut“, saacht die Dannde Liesel. „Dann hoscht du jo jetzt dei Antwort.“
„Mei Antwort? Die Antwort, dass du en frauefeindliche Mischt verzappscht?“
„Hol emol dief Luft, du Dollbohrer. Du verstehscht jo emol widder gar nix.“
„Ähm, ich ..., ähm ... Du määnscht ...?“
„Ja, ich mään“, saacht die Dannde Liesel. „Die Sort vun Sprich heer ich seit 70 Johr, ähm, will saache, seit knapp 50 Johr heer ich die Sprich, wann’s um die Weikeenichin geht odder um unser Weiprinzessin im Dorf. Un es isch kä bissel besser worre. Bis heit nit. Erscht die Daache uff’m Weifescht, do saacht änner ...“
„Loss stecke, Dannde Liesel! Ich hab’s kapiert, wo du druff naus willscht.“
„Do bischt du dir sicher?“, froocht die Dannde Liesel.
„Ich glaab schunn“, saach ich.
„Du hoscht also kapiert“, saacht die Dannde Liesel, „dass Tradition schää un gut isch? Un dass es ach schää un gut isch, wann se de Leit seit Johr un Daach verklickren, dass es bei de Wahl vun de Weihoheite um Fachkunde geht un um die Fähichkeit, die Palz un de Wei uff e zeitgemäßi Art zu repräsentiere? Un du hoscht kapiert, dass des alles ins Leere laaft, wann se am End mit emme Kreenel uff’m Kopp bei de Weifeschtereffnung neewer de Honoratiore stehen, wu ihne uff de Bobbes gucken? Un du hoscht ach kapiert, dass mer stolz druff sei kann, dass die Palz als allererschti Region den mutiche Schritt geht, die Weikeenichin durch ebbes Modernes zu ersetze?“
Ja. Ich hab’s, glaawich, kapiert. Ich mään jo blooß.
Die Kolumne
Michael Konrad schreibt seit 2007 die Kolumne „Ich mään jo blooß“ für jede Ausgabe der RHEINPFALZ am SONNTAG – und natürlich immer auf Pfälzisch. Das Buch zur Kolumne („Ich mään jo blooß: De Ding“, Lipplerbookz, Annweiler, 2022) gibt es zusammen mit allen anderen Büchern des Autors („Saach blooß“, „Können Sie Pfälzisch?“) im Buchhandel und im RHEINPFALZ-Shop.
